Það sem fer hér fyrir neðan er af heimasíðu forsætisráðuneytisins:
Ný útgáfa þjóðsöngsins
30.11.2007
Forsætisráðuneytið gefur á morgun, 1. desember, út nýja útgáfu þjóðsöngsins. Jón Kristinn Cortez tónlistarkennari hefur haft veg og vanda af útgáfunni fyrir hönd ráðuneytisins.
Á þessu ári eru 50 ár liðin síðan forsætisráðuneytið lét prenta í hefti þjóðsöng Íslendinga ásamt útsetningum tónskáldsins, Sveinbjörns Sveinbjörnssonar við texta Matthíasar Jocumssonar á laginu við þjóðsönginn og upplýsingum um tilurð hans. Í nýju útgáfunni hefur raddsvið söngsins verið lækkað úr Es-dúr, sem hefur reynst erfitt fyrir aðra en þjálfaða söngvara, í C-dúr, svo hann hæfi betur almennum einradda söng.
Þjóðsöngurinn kemur nú út í þremur heftum; fyrir blandaða kóra, karlakóra og svo kvennakóra ásamt skólakórum SA sem nota sömu útsetningarnar. Í öllum þessum heftum eru upphaflegar útsetningar kóranna ásamt útsetningu fyrir einradda söng með píanóundirleik í C-dúr. Auk þess eru þar upplýsingar um höfunda lags og ljóðs, um tilurð söngsins og útdráttur úr fánalögum og sögu skjaldarmerkisins.
Í karlakóraheftinu er að finna nýja raddsetningu, þannig út garði gerða að hana má syngja samhliða útsetningu blandaðs kórs, auk þess karlaraddir blandaðs kórs, og í hefti kvennakóra eru einnig kvenraddir blandaðs kórs.
Heftin, útgefin í um 12 þúsund eintökum, verða send öllum kórum landsins svo og öllum skólum og kirkjum. Tónlistarskólum verða einnig send hefti fyrir sinfóníusveit og lúðrasveit þar sem í eru raddskrár stjórnanda ásamt öllum hljóðfæraröddum.
Einnig er viðhafnarútgáfa fyrir einsöng með píanóundirleik í legu fyrir háar og lágar raddir og útgáfa með öllum útsetningunum auk þýðinga, á fimm tungumálum, á þjóðsöngnum og tilurð hans auk sögu fánans og skjaldarmerkisins á ensku. Verður sú útgáfa til opinberra gjafa.
Fyrirtæki Jóns Kristins, tónverkaútgáfan Ísalög hefur unnið þessa útgáfu ráðuneytisins og mun sjá um dreifingu heftanna.
Allar útsetningarnar er hægt að sækja á heimasíðu forsætisráðuneytisins.
